Գերչակի յուղ (կաստորովոյե մասլո)

Գերչակի յուղը, որն օժտված է զանազան բուժիչ հատկություններով, համարվում է ժողովրդական բժշկության կարեւոր բուժամիջոցներից մեկը։ Հարկ չկա կանգ առնել նրա հանրածանոթ եւ հնուց եկող կիրառություններից մեկի՝ փորը թուլացնող հատկության վրա։

Ընթերցողի ուշադրությունը կհրավիրենք գերչակի յուղի՝ մաշկի եւ ենթամաշկային հյուսվածքների վրա ունեցած տեղային ներգործության վրա։ Առաջին անգամ յուղի արդունավետության մասին, որպես արտաքին բուժամիջոց, տեղեկացա մի գյուղական բժշկից, որը հայտնեց ինձ, թե այն հաջողությամբ կիրառել է գորտնուկներից ազատվելու համար: Այդ օրից սկիզբ դրեցի իմ «հավաքածուին»՝ հավաքագրելով գերչակի յուղի օգտագործման բազմաթիվ եղանակներ ամենատարբեր դեպքերի համար, որոնցից կցանկանայի առանձնացնել մի քանիսը։

1. Գորտնուկները բուժելու համար հարկավոր է գորտնուկը շփել գերչակի յուղով մոտավորապես 20 րոպե քնելուց առաջ եւ առավոտյան, այնպես, որպեսզի յուղը ներծծվի։

2. Գերչակի յուղը հաջողությամբ կիրառվում է մաշկային խոցերի բուժման նպատակով։

3. Տարեց կանայք, ովքեր հույժ անհրաժեշտ դեպքերում ցույց են տալիս մանկաբարձական օգնություն, հաճախ գերչակի յուղով մշակում են նորածնի պորտը, եթե այն դժվար է լավանում։ Գերչակի յուղով շփում են կերակրող մոր պտուկները՝ կաթի արտադրությունը ավելացնելու նպատակով։

4. Աչքի լորձաթաղանթը բորբոքվելիս եւ կարմրելիս աչքի մեջ կաթեցնում են մեկական կաթիլ գերչակի յուղ՝ բորբոքային վիճակը թեթեւացնելու համար։

5. Եթե փոքրիկ երեխայի մազերը վատ են աճում, կամ անորակ են, պառկելուց առաջ գլխի մաշկը խնամքով շփում են գերչակի յուղով։ Առավոտյան գլուխը լվանում են։ Այս արարողությունը կրկնում են շաբաթը 2 անգամ, այնքան ժամանակ, մինչեւ կդիտվի մազերի որակի նկատելի բարելավում։ Հետագայում կարելի է շարունակել 2 շաբաթը կամ էլ ամիսը 1 անգամ։

6. Որպես արտաքին բուժամիջոց՝ գերչակի յուղը խորհուրդ է տրվում օգտագործել նաեւ թարթիչների վատ աճի դեպքում։ Թարթիչների, ինչպես նաեւ՝ հոնքերի աճը արագացնելու նպատակով խորհուրդ է տրվում շաբաթը երեք անգամ գերչակի յուղ քսել կոպերին եւ հոնքերի մազարմատներին։

7. Գերչակի յուղը կաթեցնում են որսորդական շների աչքերի մեջ որսի շրջանում՝ աչքի լորձաթաղանթը օտարածին մարմիններից պաշտպանելու նպատակով, որոնք կարող են հայտնվել կենդանու աչքում՝ մացառների եւ բարձր խոտերի միջով անցնելիս։

8. Մրսածության կամ բրոնխիտի դեպքում կուրծքը շփում են 2 ճաշի գդալ գերչակի յուղի եւ 1 ճաշի գդալ բեւեկնախեժի (սկիպիդար) խառնուրդով։ Սկզբում տաքացնում են գերչակի յուղը, ապա ավելացնում բեւեկնախեժը։ Ստացված խառնուրդով շփում են կուրծքը, ապա տաք փաթաթում։ Թույլ մրսածության դեպքում վերը նկարագրված շփումը կարելի է կատարել օրական 1 անգամ` պառկելուց առաջ, իսկ ուժեղ մրսածության դեպքում՝ օրական 3 անգամ։

9. Ֆերմերներից շատերը, ովքեր ծանոթ են ժողովրդական բժշկության մեջ կիրառվող բուժամիջոցներին, տանը միշտ ունենում են գերչակի յուղով լի սրվակ եւ օգտագործում այն ցանկացած կտրվածքի, քերծվածքի կամ թարախային վերքի դեպքում, ըստ որում` յուղը քսում են փետուրով։

10. Ուղիղ աղիի արտաքին մասի թութքի դեպքում նույնպես օգտագործում են գերչակի յուղը, որը փափկեցնում է աղիի լորձաթաղանթը եւ նպաստում նրա արագ ապաքինմանը։

11. Հոգնեցուցիչ աշխատանքով զբաղվելու ժամանակ խորհուրդ է տրվում շաբաթը 2 անգամ, քնելուց առաջ, ոտքերը շփել գերչակի յուղով, ապա հագնել բամբակյա գուլպաներ։ Առավոտյան ոտքերի մաշկը կլինի փափուկ, թավշանման, իսկ հոգնածության եւ ցավի զգացումը լրիվ կվերանա։ Ճիշտ նույն ձեւով գերչակի յուղը կարելի է օգտագործել ոտքերի մատների եւ ոտքերի տակի կոշտուկների փափկեցման եւ ցավը մեղմացնելու նպատակով։ Գերչակի յուղը համարվում է կոշտուկների վերացման հատուկ միջոց։

Ժողովրդական բժշկության մեջ գերչակի յուղի կիրառման զանազան եղանակներին ծանոթանալով, ես գործնականորեն փորձեցի դրանք եւ ստացա հետեւյալ արդյունքները։

64 տարեկան մի փաստաբանի աջ քթանցքի ծայրին գորտնուկ էր գոյացել։ Առավոտյան եւ երեկոյան գերչակի յուղով շփումներ կատարելով, 3 շաբաթ հետո գորտնուկը վերացավ։

62 տարեկան մի հիվանդ կնոջ ակնոցի չափը հարմարեցնելիս նկատեցի մի ահռելի մսոտ խալ (3x3x3 մմ) ձախ հոնքի վերջավորության վրա։ Խալի արտաքին մակերեսը հարթ էր, այն ավելի շատ նման էր մաշկի գույն ունեցող խաղողի հատիկի։ Խալը հայտնվել էր 3 ամիս առաջ։ Այդ կնոջը խորհուրդ տվեցի ամեն ուտելուց առաջ խալը խնամքով շփել գերչակի յուղով եւ հետո ինձ հայտնել արդյունքների մասին։ 6 ամիս հետո խալն անհետացավ։

49 տարեկան մի այլ կնոջ աջ այտին 10 տարի շարունակ եղել էր մի խոշոր մսոտ խալ, որը նրան անհանգստացնում էր, հատկապես դեմքը սրբելիս, քանի որ սրբիչը կամա թե ակամա կպչում էր դրան։ Բուժումը սկսելու պահին խալի մեծությունը կազմում էր 6x6x5 մմ։ Նկարագրված եղանակով գերչակի յուղի երկշաբաթյա օգտագործումից հետո խալի չափերը փոքրացան՝ մինչեւ 4x4x3 մմ։

30 տարեկան մի ամուսնացած կնոջ աջ այտի մեջտեղում գոյացել էր ճկույթի մեծության շագանակագույն խալ։ Այնքան մուգ էր, որ երեւում էր նույնիսկ դիմափոշու հաստ շերտի տակից։ Խորհուրդ տվեցի փորձել գերչակի յուղը։ Ամեն գիշեր, կոսմետիկան դեմքի վրայից հանելուց հետո, նա դանդաղ շփում էր խալը գերչակի յուղով՝ քնելուց առաջ անձեռոցիկով հանելով չներծծված մասը։ Երեք շաբաթ հետո շագանակագույն պիգմենտը բոլորովին անհետացավ, խալի տեղում մաշկի շերտը հարթվեց ու սովորական գույն ստացավ։

Խալերի վերացման հաջող փորձերից հետո ինձ հետաքրքրեց շագանակագույն, այսպես կոչված, «լյարդային բծերի» խնդիրը, որոնք առաջանում են մեծահասակների դեմքին եւ ձեռքերին։ Ես ցանկացա պարզել գերչակի յուղի ազդեցությունը դրանց վրա։ Ես գտա մի մարդու, որի թեւերի արտաքին մակերեսը պատված էր այդպիսի բծերով, եւ խորհուրդ տվեցի նրան գերչակի յուղով շփումներ կատարել առավոտյան եւ երեկոյան։ Հիվանդը անմիջապես համաձայնեց փորձել այս եղանակը, քանի որ ուզում էր ազատվել այդ բծերից։

Հարցեր, պատասխաններ, մեկնաբանություններ